Вистинска драма на вториот реванш меч од четвртфиналето на Лигата на шампионите во ракомет. Магдебург на домашен терен успеа да слави во регуларните 60 минути над Келце со 23:22 и да се избори за пенали, по кои вечерва беше решен вториот патник на Ф4 турнирот во Келн.
Актуелниот шампион Магдебург и ланскиот финалист понудија вистинска драма за навивачите, откако практично го повторија оној прв меч од Полска во кој Келце славеше со еден гол (27:26).
Интересно е што Полјаците имаа одлично прво полувреме и вечерва, па на пауза заминаа со предност од 13:11, но Магдебург имаше извонредно враќање во вториот дел и успеа да дојде до тој гол за победа, доволен за пат во пенал-рулетот.
По првите пет серии двата тима промашија по двапати (3:3), а во шестата серија Наи промаши за Келце, додека со голот на Магнусен, Магдебург оди на Ф4 да ја брани титулата од лани.
