✍️ Пишува: Огнен Чак Дојчиновски
Валенсија е само уште еден чекор во големата кариера на нашиот репрезентативен голман Столе Димитриевски. Нема граници за момчето кое што од Куманово, стигна до фудбалските височини и нема намера да запре.
Седиме пред некој ден со Уредникот во Липа на specialty coffee, најнова шема по Скопјево, секако, познато по тоа дека ако е нешто „ин“ мора да го пробаш. Искрено, мене не ми се доапаѓа вкусот, јас сум и понатаму за класично еспресо, но што би рекол нашиот поранешен селектор Среќко Катанец „то је то“, па ќе мора и јас да минам низ оваа „specialty coffee“ фаза. Одеднаш на шанк забележувам дека седи, ни помалку ни повеќе, туку Столе Димитриевски. Му викам на Уредникот, „еве го бе“….
Спонтано, необичен во изгледот, а класично обичен во однесувањето, репрезентивниот голман на Македонија е најнетипичната светска фудбалска звезда. Докажан „кафеџија“, Димитриевски во стил ја изгустира дозата „Етиопија“, во меѓувреме го забележа присатното новинарско дуо, не испочитува со неколкуминутен срдечен разговор и си замина. Ништо поинаку за нас од средба со типичен градски лик што го среќаваш секој ден.
Неколку дена подоцна, во истиот пладневен кафе тајминг, одекнува „бомбата“ од Шпанија. Димитриевски позира со дресот на Валенсија, сега веќе далеку од Липа и Дебар Маало, на шпанското крајбрежје. Го прави трансферот на кариерата, и од Рајо Ваљекано преминува во фудбалскиот гигант од „Местаља“. Си велам во себе, можеби Фабрицио Романо беше првиот што го најави трансферот на нашиот Столе Димитриевски, но јас ќе бидам првиот што ќе му земе изјава по самиот потпис.
Се решавам да му свртам, и по неколку секунди се слуша АЛО….
Јас: Столе честито трансфер…, а Димитриевски од таму… „Чекај со претседателот сум ќе те барам“… ок, извини, велам.
Чекав цели 24 часа да ме побара, а кога конечно се случи тоа, како да нема ништо ново. Врева од некаков локал, многу веројатно специјализиран за кафе, сега веќе членот на Валенсија се јавува да ги пренесе своите првични импресии.
„Еве сега конечно можам да ти се јавам – вели Столе, и на најкласичното прашање како се чувствуваш одговара уште по класично.
„Па како може… фантастично. Тука сум два дена, а веќе гледам каков клуб е ова. Што значи да си дел од Валенсија. Дали е ова моментот што го чекам цела кариера? Да, Валенсија е исполнување на моите детски соништа, на се за она што напорно работам цел мој живот. Не сакам да звучи тоа како некаква патетика или како излитена фраза што ја користи секој играч кога ќе му се случи вакво нешто, но јас навистина сакам да ви пренесам дека го живеам мојот сон во моментов. Клуб полн со историја, со традиција, со грст легенди на шпанскиот и светскиот фудбал. Дефинитивно голем чекор во мојата кариера, клучен веројатно. Имам многу зад мене, но верувајте уште многу многу повеќе пред мене“ – од срце за Спортспорт, Столе Димитриевски ги пренесува своите првични импресии по големиот трансфер.
И Валенсија е далеку ако одиш „пеш“….
Неговото родно Куманово, градот херој, уште еднаш по којзнае кој пат со оглед на успесите на Димитриевски го слави својот херој. Патот од таму до Валенсија е долг. Особено ако истиот води преку Работнички, Удинезе, Кадиз, Гранада, Гимнастик, Рајо….
„Во ниту еден момент не сум се сомневал во своите квалитети, и во тоа дали ќе успеам. Ама во ниту еден. Затоа и сум тука каде што сум. Желбата, вербата и напорната работа ме доведоа до каде што сум. Каде е лимитот на Столе Димитриевски? Дали е тоа Валенсија? Искрено не знам, но ќе ви кажам што знам. Дека јас сум истиот оној кој што почнуваше да се бави со фудбал, и со истата страст, жар и посветеност го правам ова. За мене нема разлика од она што ми се случуваше пред десетина години и сега. Ќе продолжам напорно да работам, да го правам она што го сакам, на тренинзите во новиот клуб, секако да не ја заборавиме и репрезентацијата. Тоа е најважно во моментот, а моето залагање, тренинзи и вложување го поставуваат лимитот. Колку повеќе работам, толку повеќе ќе постигнам“ – ни вели Димитриевски на прашањето, дали Валенсија е врвот на неговата кариера и што сега да очекуваме од него, па поентира.
„Секое дете кога почнува да се бави со фудбал сонува за вакво нешто. Сепак, пак ќе кажам, ова е остварување на се што сум си го замислувал како мал, реализација на секоја моја мечта, нема ден да не помислам да моето Куманово, на почетоците, на се што минав за да стигнам до тука. Можам да кажам само едно големо благодарам, и ветување дека ќе продолжам по патот кој што го започнав пред многу години. Секоја одлука која што ја донесов во мометот кога сум ја носел сум сметал дека е правилната, и ете стигнав до тука“ – гласно размислува нашиот репрезентативен голман.
Шпанија беше и остана избор број еден
Сите нас нормално, со оглед на се што Димитриевски покажа годиниве во дресот на Рајо, не интересира каде се летово можел да замине.
„Искрено, приоритет ми беше Шпанија. Имав понуди од Премиер лига, Серија А, но се одлучив повторно за Примера. И тука имав опции, но се одлучив за Валенсија затоа што мислам дека ова е тим кој што може многу да направи периодов. Млада, полетна екипа, многу квалитетна, со многу потенцијал, амбиција. Конечно, со оглед на тоа како во моментов изгледа трансфер пазарот во светот, нормално е што имав и сериозни понуди од Блискиот Исток. Им благодарам, но јас во моментов не се гледам таму. Јас се гледам се уште како сериозен претендент за фудбалски успеси, гладен сум за трофеи, за борба за титули, за мечеви од огромно значење. Притисок од трибини, навивање, тензија. Мене тоа во моментов ме исполнува и ме прави среќен. Да, финансиски ќе минев подобро во Саудиска Арабија, но за тоа има време. Во моментов на Столе Димитриевски поважни му се победите со Валенсија“ – искрено и од срце, за Спортспорт од Шпанија, нашиот репрезентативен голман, Столе Димитриевски.
