Селекторот на Шпанија, Луис де ла Фуенте, ги пофали своите играчи по нивната победа од 4-1 над Грузија во осминафиналето на ЕП 2024. Тој не можеше да не биде задоволен од својата екипа, која создаде мноштво шанси на натпреварот. Според него, „Фуријата“ на овој натпревар би можела да постигне дури 8 или 9 гола.
„Среќни сме затоа што знаеме колку е тешко за сите тимови. Резултатот можеше да биде поинаков бидејќи лесно можевме да постигнеме 8 или 9 гола. Имавме некои проблеми при контра нападот бидејќи тоа е нивното оружје. Им честитам на играчите, тие се оние кои ги носат одлуките во тешки ситуации, дали ќе трчаат повеќе или помалку, дали ќе ја задржат топката… Имаше опасност очај и нервоза, но успеавме да останеме смирени и да постигнеме голови, можеше да биде и повеќе, но важно е што направивме уште еден чекор напред на турнирот, што ни дава дополнителна самодоверба“, изјави Де ла Фуенте.
Во четвртфиналето, Шпанија ќе игра против Германија.
„Многу сме среќни, тоа беше важен натпревар кој не донесе во четврт-финалето против Германија. Знаевме што треба да поминеме за да стигнеме овде. Работевме многу напорно. Тие мислат дека веќе победија, но ние сме силни. Прво треба да се опоравиме, а потоа да се засилиме и да станеме попрепознатлив тим, немаме друг избор“, додаде специјалистот.
