Младата кошаркарска репрезентација на Македонија за играчи до 20 години претрпе уште еден убедлив пораз на Европското првенство во Полска. Во мечот за разигрување и пласман од 9 до 16 место, кошаркарите на селекторот Смилковски денеска беа поразени од Италија со 92:70.
Италија сигурно го почна мечот и во првото полувреме веќе успеа да створи голем капитал од 19 поени разлика. Во вториот дел се вративме со нијанса подобра игра, но не успеавме да намалиме од разликата, која Италијанците континуирано ја зголемуваа.
Теодор Симиќ со 18 поени беше најефикасен во нашата селекција, додека Јовановиќ и Бошалевски постигнаа по 13. Кај селекцијата на Италија одличен меч имаше Поцато кој постигна 33 поени.
