Најголемото дерби во фудбалска Македонија, кое вечерва се одигра на Арената во Скопје, заврши со победа на Вардар од 1:0 и тоа со голот на Дианеси во 82. минута. Заслужена победа, прва во новата сезона.
Одамна, барем кога станува збор за меч од ПМФЛ, вака не било на Арената. Спектакл, и тоа поради фановите на двата клуба, Комитите и Чкембарите а кога се игра под рефлектори на нашиот најголем стадион, тоа му дава уште поголем шарм.
Треба да се каже дека имаше два моменти на кои вардарци реагираа, во 60. и 64.минута, но судијата Игор Стојчевски не покажа на белата точка. Прашање е дали беше во право?
Инаку самото дерби започна со она почетно испитување на силите. Првата шанса за гол ја имаше Вардар, кој како што одминуваше времето како да ја преземаше иницијативата, и тоа преку Дианеси, но Гроздановски во последен момент го спаси гостинскиот тим. Треба веднаш да кажеме дека на овој меч Вардар повторно беше ослабен со неиграњето на Најдовски и Брдаровски.
Неколку минути подоцна, Закариќ креираше шанса пред гостинскиот гол, но таа топка не успеа никој да ја смести во мрежата на Пелистер, иако беше во петерецот.
Во 19. минута опасна контра на гостите, но Ѓуриќ му ја одзема топката на Керим, ќе беше многу опасно по голот на Вардар. Една минута подоцна Љамчевски опасно шутираше, но нема водство за битолчани.
Вардар можеше да поведе во 30.минута. Гужва пред голот на гостите, Закариќ беше тука, но Ристевски ја отстранува опасноста.
Пелистер може да жали, во 45.минута Талевски убаво шутираше, но Гачевски со фантастична одбрана го спаси својот гол.
Па така на пауза се замина со тие почетни 0:0.
Во второто полувреме на стартот, Пелистер како да беше поразигран и како плод на тоа Талевски повторно опасно се закани. Вардар врати преку Закариќ, но гол на дербито нема, па нема.
И тогаш силна реакција од вардарци, и од клупата на домашните кога по еден шут топката се одби од Ристевски, дали беше пенал или не? Вардарци жестоко реагираа,но судијата Стојчевски не покажа пенал за домашните.
Пет минути подоцна повторно реакција од вардарци. Сега Дианеси беше во продор, падна и кога сите помислија дека сега ќе има пенал, Стојчевски му покажа жолт картон на Дианеси поради симулација. Бадијала протестите на домашните.
Вардар продолжи со иницијативата, се посакуваше гол и победа, но не се тргна безглаво, се виде дека Пелистер е опасен од контри.
Сепак реално, како што се доближуваше крајот како и двете екипи да “дигнаа“ рачна, дали беше заморот во прашање или пак не се сакаше да се ризикува.
И кога ретко кој очекуваше, “експлозија“ на Арената. Дианеси најубаво се снајде пред голот на гостите и со убав шут со глава, во таа 82.минута, донесе водство за Вардар и донесе победа за еуфорија кај вардарци и неговите фанови.
