Организаторите на Охридскиот пливачки маратон објавија дека годинава во машка конкуренција ќе пливаат 11 пливачи, меѓу кои и тројца македонски маратонци: Леонид Мишевски, Евгениј Поп Ацев и Александар Илиевски.
Во женска конкуренција ќе настапат осум пливачки од кои една од Македонија – Росана Ѓошева.
Најпознатата пливачка манифестација од меѓународен карактер во Македонија, Охридскиот пливачки маратон, оваа година ќе се одржи по 37 пат. Главната трка на 25 километри долгата патека „Климе Савин“ од Св. Наум до Охрид, ќе се одржи во сабота 31 август.
Наградниот фонд на маратонот изнесува 12000 евра, од кои 2000 се предвидени за најбрзите во двете конкуренции на две контролни бови, односно спринтови.
Охридскиот пливачки маратон и оваа година е дел од Фестивалот на вода, а се одржува во организација на Општина Охрид со поддршка на Министерството за спорт и Пливачката федерација на Македонија. Технички организатор е ПК Охридски бранови 2008 – Охрид.
Покрај Охридскиот пливачки маратон, оваа година во водите на Охридското Езеро кај градскиот кеј, на 28 и 29 август ќе се одржи и Балканско првенство на отворени води во јуниорска конкуренција на кое учество ќе земат околу 200 млади пливачи од регионот.
