Тренерот на Челзи, Енцо Мареска најверојатно го затвори списокот од дваесетина фудбалери со кои сака да работи и да игра во текот на новата сезона, па сите останати ќе мора да си заминат. Според пишувањата на англиски „ТокСпорт“, Челзи има дури 50 играчи под договор, а Мареска процени дека 14 од нив можат да си одат уште денеска.
На листата на тотално непожелни на „Стемфорд Бриџ“ се: Ромелу Лукаку, Кепа Аризабалага, Бен Чилвел, Рахим Стерлинг, Тревох Чалобах, Ѓорѓе Петровиќ, Карни Чуквуемека, Дејвид Датро Фофана, Армандо Броја, Анџело Габриел, Дејвид Вашингтон, Алекс Матос, Харви Вејл и Лукас Бергстром.
За некои од овие фудбалери менаџментот успеа да обезбеди трансфери. На пример, Лукаку ќе замине во Наполи, голманот Кепа ќе заврши на позајмица во англиски Бурнмаут, а ветераните Бен Чилвел и Рахим Стерлинг би можеле да завршат во Манчестер Јунајтед.
Стоперот Тревох Чалоба и напаѓачот Армандо Броја најверојатно ќе му се приклучат на Ипсвич. За останатите, засега, се уште не се знае каде ќе ја продолжат кариерата.
