Во Англија немаат намера да се откажат од плановите за создавање независен фудбалски регулатор и покрај можните дисциплински мерки од управното тело на европскиот фудбал (УЕФА), изјави британскиот премиер Кир Стармер.
„Мислам дека нема никаков проблем со правилата на УЕФА бидејќи зборуваме за навистина независен регулатор. Ние сме во разговори со УЕФА и сигурен сум дека ќе најдеме решение“, рече премиерот, цитиран од „Тајмс“.
Пред неколку дена, УЕФА ја предупреди владата на Обединетото Кралство дека Англија ризикува да го пропушти Евро 2028, чиј кодомаќин е, доколку премиерот Кир Стармер продолжи со плановите за создавање фудбалски регулатор.
Стармер е долгогодишен навивач на лондонскиот фудбалски клуб Арсенал, редовно ги посетува натпреварите на тимот и самиот аматерски игра фудбал. Британскиот премиер во јули присуствуваше на финалето на Европското првенство во Берлин, во кое играа репрезентациите на Англија и Шпанија.
Уште во 2023 година, претходната конзервативна влада рече дека одобрила создавање на регулатор за следење на финансиското здравје на фудбалските клубови за да се избегнат банкроти. Овој комитет се очекува да започне нов систем на годишно лиценцирање за тимови во петте врвни дивизии на англискиот фудбал. Конкретно, од нив ќе се бара да обезбедат документација за одржлив бизнис модел и добро корпоративно управување за да им биде дозволено да учествуваат на првенството.
