Шпанската Џирона за која настапува Бојан Миовски треба да биде горда на своето деби во Лигата на шампионите, според тренерот Мичел, по поразот со 1-0 на гостувањето кај Пари Сен Жермен во Франција во првиот круг.
„Во соблекувалната играчите беа малку разочарани, но јас реков дека треба да бидеме горди на играта што ја одигравме“, изјави Мичел, цитиран од Ројтерс.
„Пари Сен Жермен не победи, но нашиот голман направи неколку добри одбрани. Имаше два или три што можеа да бидат голови. Мораме да признаеме дека тие заслужија да победат, но ние сме горди на начинот на кој работевме. да видиме дали ќе имаме уште една шанса да дојдеме во Париз следната година“, прокоментира тренерот на Џирона.
Шпанецот призна дека неговите играчи биле нервозни за нивниот прв настап во најпрестижното европско клупско натпреварување, но бил задоволен од нивната изведба бидејќи се соочиле со тим од највисоко ниво.
„На почетокот на натпреварот бевме многу нервозни, се гледаше тоа. Но, како што течеше првото полувреме покажавме посветеност и став. Во вториот дел бевме уморни, Пари Сен Жермен повеќе не притискаше и продолживме да се браниме. Го поминавме нашиот прв обид во Лигата на шампионите, се натпреварувавме против одличен тим“, додаде Мичел.
Македонскиот репрезентативец не доби шанса на оваа средба, своето деби во ЛШ ќе го чека на следниот дуел.
