Не можеше да има подобар почеток на нова авантура во Милано за Ненад Димитријевиќ, кој почна да ги собира и првите наградите во новиот тим. Нашиот репрезентативец викендов беше прогласен за МВП во Суперкупот на Италија, кој неговиот тим Милано го освои по победата против В. Болоња по продолженија.
Во интервју за „Еурохупс“, нашиот кошаркар откри дел од возбудата за трансферот во Италија и очекувањата од новата сезона во Евролигата, но зборуваше и за своите позиции на теренот каде се чувствува најдобро.
„Многу сум возбуден што сум овде. На тимот му оди одлично, а јас долго чекав да бидам тука во Евролигата. Многу сум возбуден и среќен“, изјавил Нено.
На прашањето како се гледа себе си и на која позиција е најдобар, нашиот репрезентативец вели: „Себеси повеќе се гледам како плејмејкер, создавајќи ситуации за сите за да им ја олеснувам играта на моите соиграчи. Но, се гледам и како стрелец, човек кој може да постигне многу поени. Но, тоа е една од силните страни на мојата игра: можам да играм на двете позиции по малку. Мислам дека една од работите што се обидов да ги подобрам и да бидам конзистентен во текот на мојата кариера: да можам да играм на двата начини, не само да бидам напаѓач кој ја додава топката, туку човек кој може да постигне кош, да ја додава топката и да креира игра. Тоа е една од моите најголеми предности“, вели Нено.
Во интервјуто зборуваше и за некои работи кои треба да ги подобри под менторство на легендарниот Еторе Месина, а тоа е одбраната.
„Да се биде одбранбен играч не е една од моите најголеми предности, но мислам дека сум добар тимски дефанзивец. Знам каде можам да помогнам, а каде не. Под водство на Месина се обидувам да видам во кои конкретни ситуации можам да се подобрам. Тоа е исто така една од целите за оваа сезона: да докажам дека можам да бидам цврст, можеби не одличен, но цврст дефанзивец“, вели меѓу другото во интервјуто за „Еурохупс“ нашиот кошаркар кој веќе почна да блеска и во дресот на Милано.
