Фудбалерите на Лајпциг ја остварија најубедливата победа во новото коло на германската Бундеслига, откако денеска на домашен терен со 4:0 беа подобри од екипата на Аугзбург. Без нашиот Елиф Елмас, кој поради повреда не беше во составот, „биковите“ успеаја да дојдат до посакуван триумф, откако во минатите две кола Лајпциг двапати ремизираше. Првите два гола ги постигна Шешко (1:0, 2:0), а потоа на 3:0 зголеми Опенда, за конечните 4:0 да ги постави Симонс.
Изненадувачки убедлива победа на гости обезбеди Ст. Паули. Новајлијата со 0:3 беше подобар на гостувањето од екипата на Фрајбург. Борусија Менхенгладбах со гол во последните минути дојде до победа над Унион Берлин од 1:0, Хајденхајм го совлада Мајнц на гости со 0:2, додека Волфсбург имаше победа в рака на мечот со Штутгарт (2:1), но дозволи гостите со играч помалку да израмнат во 97. минута преку Ундав за конечни 2:2.
