Првиот македонски боксер кој се појави на рингот во Софија на Европското првенство за боксери до 23 години, Ален Рустемовски, почна со победа. Нашиот боксер во категоријата до 57 килограми во првото коло беше подобар од Витас Хартсуеју и успеа да се пласира во осминафиналните пресметки.
Следен противник на Рустемовски ќе биде Ирецот Рајан Гејвин Шејн, кој во првата борба беше поуспешен од Тирзоман од Романија.
Денеска во попладневната сесија на првиот ден на првенството во Софија ќе се појават уште двајца македонски боксери. Дион Лена во категоријата до 63,5 килограми ќе боксува со Гагнидзе од Грузија, додека по него Арјан Исени во категоријата до 80 килограми ќе ги вкрсти ракавиците со Израелецот Илјушнок.
