Интер Мајами со победа ја започна својата серија во плеј-офот во МЛС, откако го совлада Атланта Јунајтед со 2:1 со головите на Луис Суарез (2′) и Жорди Алба (60′). Лионел Меси беше асистент на вториот гол, а кај домаќините стартуваше уште еден поранешен ас на Барселона, Серхио Бускетс.
Интер Мајами последен пат загуби во МЛС натпревар на 7 јули против Синсинати.
Натпреварот во живо го следеше Пол Погба. Францускиот репрезентативец се поврзува со ново засилување во Интер Мајами. Тој беше на трибините и на натпреварот против Шарлот во септември.
Во составот на Атланта Јунајтед, поранешниот репрезентативец на САД Бред Гизан направи неколку клучни одбрани.
Луис Суарез ги донесе домашните во водство во 2. минута. Нападот го започна Диего Гомеш, кој комбинираше со Жорди Алба, а ударот на Суарез не му остави шанса на Гизан.
Потоа следеа две промашувања на Меси и центаршут на неговиот соиграч Хектор Мартинез. Во средината на првиот дел и Меси беше запрен покрај стативата. Во 39. минута Атланта Јунајтед изненадувачки израмни со голот на Грузиецот Саба Лобжаниџе.
По паузата, домаќините продолжија со леснотија да создаваат шанси за гол. Во 60. минута Меси комбинираше со Жорди Алба, а тој упати многу прецизен удар надвор од шеснаесетникот и Интер Мајами повторно дојде во предност.
