Женската сениорска кошаркарска репрезентација на Македонија го одработува и вториот ден од подготовките за квалификациските средби за пласман на Евробаскетот во 2025 година.
Македонија прво ќе ја пречека репрезентацијата на Украина во натпревар закажан за 7 ноември во салата на СРЦ „Кале“ во Скопје (влезот е бесплатен), а три дена подоцна, ќе ја нагостиме и репрезентацијата на Португалија, на истото место, и во ист термин.
Една од најискусните кошаркарки во нашата женска национална селекција Нена Трајчевска ги пренесува своите очекувања во пресрет на дуелите со Украина и Португалија:
„Пред сѐ, после цела година, убаво чувство е повторно да се собереме дома со овие девојки. Уште поубаво што и двата натпревари ги играме на домашен терен. Немаме многу време за спремање. Украина и Португалија се комплетни тимови и доаѓаат во Скопје со полн состав и да победат. Нема да е лесно, ја имаат фаворитската улога, но, ние сме навикнати на тоа, нема да ни пречи. Како и секогаш, очекувам да имаме позитивна атмосфера, карактер и менталитет за борба, од првата до последната минута на двата натпревари, кои здравје би ги крунисале со победи“- истакнува Трајчевска пред продолжението на квалификациската трка во која досега имавме два порази.
