Менаџерот на Интер, Симоне Инзаги беше воодушевен по успехот од 1-0 над Арсенал во Лигата на шампионите. Тој ги пофали своите играчи и рече дека тоа е важна и тешко извојувана победа за неговиот тим.
„Ние се соочивме со одличен тим кој се натпреварува на највисоко ниво во Премиер лигата. Моравме да се браниме поприсебно од вообичаено. Но, добро се снајдовме и можевме да постигнеме уште повеќе голови. Мислам дека одигравме одличен натпревар против екипа која игра со голем интензитет“, изјави Инзаги.
Стратегот на Интер ги пофали и навивачите, за одличната атмосфера.
„Ова е незаборавна ноќ бидејќи навивачите не престанаа да не поддржуваат од првата минута до последната и беше убаво да се слави со нив по последниот судиски свиреж. Тие сфатија дека одигравме одличен натпревар и покажавме одличен дух. Арсенал е еден од најдобрите тимови со кои се сретнавме на нашиот пат во Европа во последните години. Имаме право да се радуваме на оваа победа, но да не застанеме тука – одиме на нова победа“, додаде специјалистот.
