Поранешниот фудбалер на Барселона и репрезентативец на Шпанија, Андрес Иниеста стана сопственик на клуб во данската трета лига. Шпанецот го купи мнозинскиот удел на третолигашот Хелсингор.
„Хелсингор е добар клуб со одлични капацитети, посветени луѓе и потенцијал да стане важен дел од данскиот фудбал. Клубот има големи амбиции и ние ќе се потрудиме да ги оствариме. Ова ќе биде постепен процес. Ни претстои долга зимска пауза, но ние сме подготвени да работиме напорно и потоа ни претстои возбудлива пролет“, изјави Иниеста.
Иниеста, кој ја заврши својата играчка кариера во октомври, во моментов е во Данска каде заедно со своите соработници ја посети клубската инфраструктура.
