В недела со почеток од 16 часот во Скопје, по повод Денот на ослободувањето на градот, 13 Ноември, во организација на Атлетската Федерација на Македонија ќе се одржи традиционалната меѓународна ноќна атлетска трка “Низ улиците на Скопје 2024”. Ноќната атлетска трка е една од најстарите манифестации кај нас и една од најстарите на Балканот и се одржува традиционално секој ноември во чест на Ослободувањето на Град Скопје. Првата трка била одржана во далечната 1953 г. и се трчало во поединечна и екипна конкуренција, стартот и целта биле на срeдината на плоштадот, a должината била 5 км.
Годинава ќе имаме две трки и тоа главна трка на 5 км. и детска трка до 12 години на 400 м. Пријавени се повеќе од 400 учесници во двете трки. Стартот и целта на трките ќе биде во близина на Триумфалната капија на централниот плоштад во Скопје.
