Македонската фудбалска репрезентација денеска од 15:00 часот на Арената Тодор Проески во Скопје, ќе го одигра последниот дуел од групната фаза од овогодинешната Лига на Нации. Противник е репрезентацијата на Фарски Острови која што ја пречекуваме како освојувачи на групата со 13 бодови, дека пак противникот во моментов е втор со шест. Македонија пред само два дена на домашен терен славеше против Летонија со 1:0, па сега сакаме да ја довршиме оваа кампања со стил и на најдобар можен начин. Со нова победа и 16. бода.
Да продолжи победничката серија
Македонија во моментов како ретко кога, има серија од четири победи по ред. И тоа на официјални мечеви во Лигата на Нациите. Нашиот национален тим ја стартуваше оваа серија на домашен терен против Ерменија 2:0, за да следуваат оние одлични 0:3 кај Летонија и триумфот во Ереван повторно над Ерменија 0:2. Нормално го вбројуваме и мечот против Летонија во четвртокот што значи дека сега одиме на „пет од пет“.
Фарски ни се должници од првиот меч
А се во оваа кампања за нас започна на Фарските Острови. На гостувањето кај овој навидум лесен противник. Да, лесен ама на хартија. Тоа го научивме на потешкиот начин. Вештачки терен, ветар, и мотивиран ривал беа доволни ние таму да киксираме. Примивме гол рано, и не се опоравивме од истиот. Мечот заврши 1:1, а ние како потоа да ја разбравме лекцијата па во продолжение на оваа Лига Нации не само што не загубивме, туку не одигравме ниту реми, туку победивме се. И тоа без примен гол.
Миовски не спаси минатиот пат во Скопје
Од друга страна пак, ова не е прво гостување на репрезентацијата на Фарски Острови во Скопје. Минатата година во март „Рибарите“ пристигнаа во Скопје на пријателски меч, а истиот заврши со минимални 1:0 за Македонија. Тогаш во улога на резервист Бојан Миовски влезе и ја спаси ситуацијата во 81. минута. Се надеваме дека овојпат многу порано ќе ја завршиме задачата.
Димитриевски ќе руши рекорди
Нашиот голман Столе Димитриевски како и целиот наш национален тим во континуитет нема примено гол. Како што и самиот најави најважна е победата, но таа ќе дојде само и единствено ако сме цврсти во одбаната и ако не примиме гол. Така беше на изминатите четири меча, така нека биде и овојпат.
Ќе мораме без Елиф Елмас
За жал, на оовј дуел ќе мора да настапиме без Елиф Елмас. Тој се повреди на мечот против Летонија, излезе уште во првиот дел. Го мачи задната ложа, многу незгодна повреда за која сака само мирување. Сепак, веруваме дека момците на Благоја Милевски и без него, но и за него ќе одиграат денеска фајтерски како што знаат и дека ќе ни донесат нова радост.
