За многумина Зинедин Зидан е еден од најдобрите играчи во историјата. Легендарниот Французин освои се, беше светски првак, европски првак и освојувач на Лигата на шампионите. Ја освои и Златната топка, а како тренер три пати со Реал беше најдобар во Европа.
Професионалната кариера на Зидан траеше од 1990 до 2006 година. Играше за Кан, Бордо, Јувентус и Реал Мадрид. Освои 11 клупски трофеи, додека со Франција беше светски и европски првак. Во 1998 година ја освои Златната топка, односно беше прогласен за најдобар светски фудбалер.
Лео Меси, за многумина апсолутен број еден во историјата на фудбалот, откри дека му се восхитува и на легендарниот Зизо. Аргентинецот имаше можност да игра против него на почетокот на својата играчка кариера, а ривали беа подоцна во времето на Зидан на клупата на Реал. Зборувајќи за Французинот, Меси рече:
“За мене, Зидан е еден од најдобрите играчи во историјата, секогаш му се восхитував. Го следев многу во Реал Мадрид и страдав затоа што беше од Мадрид. Тој секогаш беше вистински играч. Различен, елегантен, висок, магичен , имаше се!“, рече Меси.
Меси дебитираше за првиот тим на Барса пред 20 години и до 2021 година, кога замина во ПСЖ, стана рекордер на клубот по настапи, голови, асистенции и трофеи. На 778 официјални натпревари, тој постигна 672 гола и постави 303 од нив.
