Кливленд стана четвртиот НБА тим кој успеал сезоната да ја отвори со 15-0. Кавси до ова остварување дојдоа откако на домашен терен славеа со убедливи 128-114.
Ова остварување претходно им појде од рака на Вашингтон Капитолс и Хјустон Рокетс, додека пак рекордот го држи Голден Стејт (24-0). Сите овие тимови НБА сезоната ја завршиле во финалето, но само Рокетс по еден таков старт успеале да ја освојат титулата.
Кавси на оваа средба беа без помошта на Митчел кој е повреден, па Гарланд со 25 поени и 12 скока беше лидер кај победникот.
Уште еден меч на Денвер без Никола Јокиќ и нов пораз. Српскиот центар очекува дете, па затоа го нема во составот на два натпревари. Овој пат неговиот тим беше поразен од Мемфис на гости со 105-90.
За разлика од Денвер, тимот на Далас може да победува без Лука Дончиќ. Словенецот го немаше во составот, но неговиот тим беше подобар од Оклахома на гостински терен со минимални 119-121.
На останатите средби Портланд славеше против Атланта со 114-110, Вашингтон беше поразен од Детроит на домашен терен со 104-124, Хјустон славеше на гости кај Чикаго со 143-107, Њујорк го доби дербито со Бруклин (114-104) и ЛА Клиперс беа подобри од Јута со 116-105.
