Селекторот на француската репрезентација Дидие Дешамп планира средба со напаѓачот на Реал Мадрид, Килијан Мбапе за да разговара за улогата на играчот во националниот тим, пишуваат француските медиуми.
Тренерот ќе ја отвори темата за капитенската лента на „петлите“ и дали Мбапе сака да остане капитен на тимот.
Мбапе не беше повикан во националниот тим во октомври, кога беше жестоко критикуван дека избрал да оди на одмор во Шведска и ноември, додека печатот во Франција нашироко разговараше за заладените односи меѓу Дешамп и напаѓачот на Реал Мадрид.
Килијан Мбапе се приклучи на Реал Мадрид минатото лето како слободен играч, заминувајќи од Пари Сен Жермен. Од почетокот на сезоната, тој веќе одигра 16 натпревари во сите натпреварувања, на кои постигна осум гола и даде две асистенции, но и покрај тоа, неговиот настап со мадридскиот тим исто така беше предмет на многу критики.
