По триумфот над Шкупи во градската пресметка во минатото коло пред две недели, секако пораснаа апетитите кај сите во Вардар. Предводени од старо – новиот стратег Гоце Седлоски, сега Вардар очекувано оди по добар резултат и во Охрид кај Воска. Денеска од 13 часот во меч од 15.коло во ПМФЛ, Вардар и гостува на Воска во битка за избегнување на дното на табелата. Во пресрет на овој меч и двете екипи имаат по 11 бодови и се на делба на претпоследното место на табелата. Од ова се гледа колку е важен овој меч и за двете екипи, посебно за нашиот најтрофеен клуб кој со Седлоски на клупата има намера и тоа како што побрзо да ја напушти оваа зона на табелата.
Вардар има и мотив повеќе ако се знае што се случуваше во Скопје на првиот меч оваа сезона меѓу овие две екипи. Тогаш стратег на тимот Горан Петрески а Вардар на Арената беше поразен со 1:3 од денешниот ривал. Ете го тој мотив за вардарци.
Секако дека Воска не е наивен противник, тоа сите го знаат. Финалистот во Купот од последното финале на одредени мечеви во оваа сезона, а посебно на свој терен во Охрид, покажа дека знае и тоа како да игра добар фудбал. Затоа Вардар ќе треба да го даде својот максимум ако сака да дојде до добар резултат, резултат кој ќе му одговара.
Кога сме кај традицијата, овие два клуба досега се имаат сретнато девет пати. Воска славела на шест а Вардар на три, интересно е тоа што досега нема реми кога играат Вардар и Воска.
