Раул Алонсо во својата „ера“ на клупата на Пелистер во Лигата на шампиони освои еден бод против Фредериција на домашен терен. Иако многумина очекуваа победа, сепак и ремито на крајот се покажа како доволно во битката за Топ16 фазата во ова натпреварување.
Шпанскиот стратег пред себе има уште поголем предизвик, а тоа е утрешното гостување на лидерот во групата А, Веспрем.
„Веспрем е меѓу најдобрите екипи во Европа со години, имаат долга историја и супер-екипа покриена со играчи од светска класа. Не е лесно да се подготват сите детали за овој натпревар. Имаме три дена за подготовка и ќе се припремиме најдобро. Тешко е да се игра пред фановите на Веспрем, гледачите вршат голем притисок и многу е важно да бидеме најдобри и со добар пристап. Одиме таму за да бидеме во секој дел од натпреварот на висината на задачата. Да го намалиме играчкиот недостаток на минимум.
Чави Пасквал е мој познаник со години и чест е да се игра против него. Сум играл неколкупати против неговите екипи и сите знаат дека е меѓу најдобрите тренер во светот. Освои многу трофеи со Барселона и тоа ќе биде голем предизвик за мене“, изјави шпанскиот стратег на клупата на Пелистер.
