И дефинитивно Кавадарци, посебно фудбалско Кавадарци и тоа како знае да ги почитува своите великани, знае да ги почитува вредностите. Кавадарци е познато во Македонија дека изнедрило многу великани од сите сфери на општествениот живот, а посебно од спортот и фудбалот. Еден од нив е Андон Дончевски или Чичко Дончо, родениот кавадарчанец, во свое време еден од најдобрите македонски фудбалери и тренери, а ќе се памети и како прв селектор на нашата најдобра фудбалска репрезентација во самостојна Македонија.
Денеска по иницијатива на Сашко Тасев, член на УО на ФФМ и претседател на ОФС Кавадарци, во Кавадарци беше откриена спомен – плоча на родната куќа на Андон Дончевски.
За “СпортСпорт“ токму Тасев образложува зошто е направен еден вака голем гест од неговата страна, секако и од фудбалско Кавадарци:
„Андон Дончевски тоа го заслужува. Сакавме со спомен – плоча, која денеска беше откриена од моја страна во присуство на спортски, фудбалски и останати личности, да ја одбележиме неговата родна куќа во нашето Кавадарци. Тој тука е роден и живеел до својата 8-9 година, потоа се сели во Скопје. Секогаш кога доаѓа во Македонија, доаѓа и во Кавадарци, ми се јавува и заедно доаѓаме овде на ова место каде што е роден и каде со задоволство евоцира спомени. Секогаш е прекрасно да си во негово друштво. Ние кавадарчани имаме посебен пиетет кон него, кон големиот Дончевски“ вели Тасев.
Инаку Дончевски моментално е во Австралија и денеска беше информиран за откривањето на спомен – плочата.
“Јас лично разговарав со него и му кажав што сме направиле во негова чест. Му беше мило, слушнав дека плаче од среќа. Иако има речиси 90 години сеуште е витален, чудо од човек. Во мојот говор при откривањето на спомен – плочата кажав и тоа дека градот Кавадарци има зошто да биде горд зошто во својата подалечна и поблиска историја знаело да изнедри великани од сите сфери на општествениот живот, и тоа политичари, уметници, спортисти, бизнисмени и др. Еден од тие великани е и Андон Дончевски. Со овој наш гест јас лично, но и сите мои сограѓани сакавме да му се заблагодариме на Чичко Дончо за се она што тој го има направено во фудбалот и општо во неговиот живот за неговото Кавадарци и секако за Македонија“ заклучи Сашко Тасев.
