Ниту Хрватска, ниту Србија не се прославија на Европското првенство кое се одржува во Австрија, Унгарија и Швајцарија. Двете репрезентации се спакуваа по завршувањето на групната фаза, и двете репрезентации завршија зад македонската женска ракометна репрезентација.
Хрватска е 19-та веднаш зад Македонија, додека пак Србија е 21. По поразот од Швајцарија, поранешниот селектор на македонската машка ракометна репрезентација, а сегашен на женскиот национален тим на Хрватска, Ивица Обрван порача дека резултатот не е изненадување. Хрватска заврши последна во групата со скор од реми и два порази.
„За вистинските познавачи на ракометот, а кај нас ги нема премногу, овој резултат не треба да биде изненадување. Имавме шанси, но Швајцарија е дома, има екипа која е долго време заедно. Жал ми е што сме на 5:5 почнавме да грешиме, да промашиме зицери…
Швајцарија направи голем плус, но јас верував дека можеме да се вратиме во игра. Кога ќе добиете големо водство, не е лесно и не успеавме. На крајот заслужена победа на Швајцарија. На овој тим му треба повеќе работа, тренинзи, се виде дека има потенцијал…Тие не бараа алиби, ние се надевавме на успех. Животот продолжува“.
