Раководството на Валенсија ја разгледува опцијата да го ослободи 49-годишниот тренер Рубен Бараха, пренесува шпанскиот весник Марка.
Оваа вест доаѓа откако тимот за кого настапува македонскиот репрезентативен голман, Столе Димитриевски загуби тесно со 0-1 од Ваљадолид во натпревар од 17. коло на шпанската Ла Лига и падна на последното место во поредокот со само 10 бода по 15 одиграни натпревари.
Според изворот, раководството на клубот се колеба меѓу опциите за итно отпуштање на специјалистот и продолжување на позајмицата за уште два натпревари во Ла Лига, во кои Валенсија ќе се сретне со други два директни ривали во битката за опстанок – 18-от Еспањол и 16-ти Алавес.
Се дознава дека конечната одлука зависи од сопственикот на клубот, Питер Лим, кој доколку дојде до одлука да го ослободи својот тренер ќе мора да се раздели со 5 милиони евра, кои влегуваат во клаузулата за обештетување на Бараха, кој е задолжен за Валенсија од февруари 2023 година.
Инаку, самиот Бараха демонстрираше самодоверба и покрај понижувачката ситуација и сподели дека ова е само привремена ситуација од која неговиот тим може да излезе.
„Се извинуваме за резултатот и маките во текот на сезоната. Но, нема да се предадеме и ќе продолжиме да се бориме“, беа зборовите на специјалистот за време на прес-конференцијата по крајот на натпреварот.
Инаку по двата досегашни настапи за Валенсија во Купот на Шпанија, нашиот репрезентативен голмен доби стартно место во составот на „лилјаците“ на гостувањето кај Ваљадолид.
