Интер забележа огромна победа од 6-0 на гостувањето кај Лацио, а главниот тренер на „нероаѕурите“, Симоне Инзаги не покажа милост кон својот поранешен тим. По мечот тој не пропушти да ги „пецне“ критичарите и уште еднаш истакна дека е исклучително горд што е на чело на овој тим.
„Беше важно да се победи силен противник кој е во одлична форма. По првите 20 минути нагло го подигнавме нивото, но по третиот гол дојде до пад. Веќе три и пол години овие момци даваат се од себе и горд сум што сум нивен тренер. Знаеме дека се уште ништо не сме постигнале, но денеска имаме на што да си честитаме.
Дали сме најсилниот тим во Серија А? Тоа треба да се докаже на терен. Бевме свесни за силните страни на Лацио и ги ограничивме. Имаме натпревар помалку, ни претстои и италијанскиот Суперкуп, така што работите не стануваат полесни. Во последните два и пол месеци бевме многу константни. Сепак, тоа важи и за другите тимови, вклучувајќи го и Лацио. Погледнете колку се блиски екипите на табелата“, истакна тренерот на „нероаѕурите“.
Тој потенцира дека не се фокусирани на медиумите, туку само на натпреварите.
„Не е лесно да се игра речиси постојано со високо темпо и тоа ме прави најмногу горд. Сите заслужуваат да бидат на теренот и јас се трудам да го ротирам составот што е можно повеќе. По поразот од Милан во септември, многумина чекаа да зачекориме на погрешната страна, што се случи во Леверкузен. Многу е кажано и напишано, но за среќа јас и играчите не обрнуваме внимание на медиумите, фокусирани сме на натпреварите“, изјави Инзаги.
