Кошаркарите на Милвоки Бакс се новите освојувачи на НБА Купот. Тие во финалето кое се одигра во Лас Вегас ги надиграа Оклахома Сити Тандер со 97:81 и со тоа стигнаа до титулата што минатата сезона ја освоија Лос Анџелес Лејкерс, во премиерното издание на ова натпреварување.
По целосно изедначеното прво полувреме, на пауза Милвоки замина со минимална предност од 51:50. Бакси кои речиси целосно доминираа во преостанатиот дел од мечот беа предводени од неверојатниот Јанис Адетокумбо за кого одбраната на Оклахома немаше одговор.
Грчкиот кошаркар беше прогласен за МВП на турнирот, зад неговото име запиша трипл-дабл учинок од 26 поени, 19 скока и 10 асистенции, а сето ова додаде три блокади и две украдени топки. Одлична поддршка имаше од Демијан Лилард, кој постигна 23 поени, додека Брук Лопез и Гери Трент Јуниор додадоа по 13 поени.
Прв стрелец во поразениот тим беше Шаи Гилгеус-Александер со 21 поен, но и слаб шут 8/24. Џејлен Вилијамс постигна 18 поени. Оклахома Сити имаше слаби 15,6 отсто шут за три поени во финалето. Нејзините играчи погодија само 5 од 32 тројки. Тие шутираа нешто помалку од 34 отсто од поле.
