Екипата на Борнмут го направи изненадувањето на колото веројатно во цела Европа, не само во Премиер лигата. Победата над Манчестер Јунајтед на Олд Трафорд од 0:3 го стави Борнмут во центарот на вниманието, а менаџерот Ираола ја смирува ситуацијата што се вели, затоа што преголема еуфорија од ваква победа може да има лоши последици.
„Сите тимови се доста блиску. Да не победеше Манчестер Јунајтед ќе беше пред нас. Прашање е на моментот, следната недела можеби ќе бидеме зад нив“, прокоментира Ираола.
„Оваа победа нема да исчезне, но не дека премногу менува нешто. Мораме да освоиме уште многу бодови, па победуваме повторно недела по недела, натпревар по натпревар. Мислам дека нема смисла да се радуваме толку рано во сезоната. Да, во моментов стоиме добро на табелата но треба напорно да работиме за да останеме таму“, изјави шпанецот па потоа го пофали и чуварот на мрежата на Борнмут.
„Настапите на Кепа ни помогнаа оваа година. Мислам дека тој е самоуверен и со млада бековска линија ни требаат играчи со искуство. Ова е важна победа за нас. Победивме со 3-0, но беше потешко отколку што изгледаше“ – рече Ираола.
