Зимава ќе заврши епизодата на Елиф Елмас, македонскиот репрезенаттивец и интернационалец во Германија. Поточно во тимот на Ред Бул Лајпциг. Иако се сметаше дека Елмас ќе има сериозна улога во тимот каде што беше доведен како огромно засилување, тоа не само што не се случи, туку тој и ќе го напушти овој клуб.
Спортспорт дознава дека Елмас е на пат да се врати во Италија, онаму каде што ја доживеа својата полна фудбалска афирмација, но тоа нема да биде тимот на Наполи.
Напротив, Елиф Елмас според нашите информации, ќе се пресели во екипата на Фиорентина. Под кои услови и како тоа клубот од Фиренца ќе го изведе останува да видиме. Дали тоа ќе биде позајмица, или пак Ред Бул Лајпциг ќе сака целосно да се ослободи од Елмас, па ќе го продаде ќе покаже периодот кој следува.
Италија очигледно најмногу му одговара
Она што е сигурно дека досега Елиф Елмас го играше својот најдобар фудбал во Серија А. И тоа во дресот на Наполи со кого ја освои и титулата. При заминувањето од Наполи, Елмас според нашите информации, имаше отворена понуда од Милан, но и од Сасуоло, но се реши комплетно да го промени правецот во кариерата. Очигледно дека погреши, затоа што во Лајпциг е само замена, а на некои мечеви и само резерва, што е недопустливо со оглед на фактот дека тој е во најдобрите денови од кариерата.
