Во НБА лигата се одиграа шест натпревари. Во последниот меч од вечерта, Лос Анџелес Лејкерс на домашен терен го совлада Портланд со резултат 114:106. Најстариот играч во лигата, Леброн Џејмс, кој пред само три дена наполни 40 години, блескаше на оваа средба.
Леброн за 36 минути поминати на теренот постигна 38 поени, забележа три скока и додаде осум асистенции. Тој имаше одлична шутерска вечер, особено кога е во прашање прецизноста од далечина. Погоди 7/10 од зад линијата за три поени, а вкупно упати 15 од 25 удари од поле.
Успеа да демонстрира како и во петтата деценија од животот може да смета на нереален атлетизам кога прелета покрај рекетот и ја заврши акцијата со жестоко забивање. Одлична вечер имаше и Макс Кристи со 28 поени. Кај Портланд најдобар беше Анферни Симонс со 23 поени.
LEBRON STILL FLYING AT 40 😭🔥 pic.twitter.com/V1lMgdmik2
— LakeShowYo (@LakeShowYo) January 3, 2025
На останатите средби, Мајами беше поразен дома од Индијана со 115-128, Минесота загуби од Бостон со 115-118, Бруклин славеше кај Милвоки со 113-110, Оклахома беше подобра од ЛА Клиперс со 116-98, Голден Стејт славеше на домашен терен против Филаделфија со 139-105.
