Откако завчера Брера и Воска ги официјализираа своите нови тренери, а неколку дена претходно тоа го сторија Беса и Пелистер, сега познати се сите 12 тренери во нашата ПМФЛ. Познато е дека во овој зимски период дури четири клубови ги сменија своите “шефови“, тоа значи дека бројката на тренерски смени во ПМФЛ од стартот на сезоната до сега дојде до седум клубови. Само Силекс, Шкендија, Работнички, Струга ТЛ и Тиквеш не менуваа ништо, барем не досега.
Ова е моментална состојба, јасно е дека до 16 февруари можно е некој клуб да се одлучи за уште некоја смена, но ќе видиме, има време. Важно е дека ова е списокот со тренери кои ја започнаа новата 2025 година како шефови во сите наши клубови во ПМФЛ.
КЛУБОВИ ВО ПМФЛ И НИВНИТЕ ТРЕНЕРИ
СИЛЕКС: Александар Васоски (45 г)
ШКЕНДИЈА: Јетон Беќири (42 г)
РАБОТНИЧКИ: Горан Станиќ (52 г)
ГОСТИВАР: Мерт Нобре (44 г – Бразил)
СТРУГА ТЛ: Ќатип Османи (55 г)
ШКУПИ: Алпарслан Ердем (36 г – Турција, Германија)
ПЕЛИСТЕР: Срѓан Захариевски (51 г)
БРЕРА: Тони Атанасов (50 г)
ТИКВЕШ: Ѓорѓи Мојсов (39 г)
БЕСА: Горазд Михаилов (50 г)
ВАРДАР: Гоце Седлоски (50 г)
ВОСКА: Сафет Ислер (63 г – Турција)
-Нови тренери оваа зима се Срѓан Захариевски (Пелистер), Тони Атанасов (Брера), Горазд Михаилов (Беса), Сафет Ислер (Воска).
-На Михаилов тимот од Добри Дол му е трети оваа сезона, да потсетиме дека беше стратег во Вардар и Брера. Додека на Захариевски му е втор, и тој беше тренер во Вардар.
-Само тројца од горенаведените дванаесет освојувале титули во ПМФЛ. Тоа се Александар Васоски со Вардар, Ќатип Османи со Шкендија и Гоце Седлоски со Вардар и Шкупи.
-Најмлад е Алпарслан Ердем, стратегот на Шкупи, кој има само 36 години, по него како втор најмлад е Ѓорѓи Мојсов (Тиквеш) со 39 години.
-Само троца странци и тоа Мерт Нобре (Гостивар) кој е Бразилец, ама има и турски пасош. Потоа Алпарслан Ердем (Шкупи) кој е Турчин, ама има и германско државјанство. Трет од странците е Сафет Ислер (Воска) кој е Турчин.
-Највозрасен е Сафет Ислер (Воска) со 63 години, по него тука е Ќатип Османи (Струга ТЛ) со 55 години.
