Денеска стартува 29-то издание на Светското првенство во ракомет кое ќе се одржи во Хрватска, Данска и Норвешка, а на кое повторно ќе биде развиорено македонското знаме. 32-те земји учеснички се поделени во осум групи со по четири репрезентации, а најдобрите три од секоја од нив ќе обезбедат место во главната рунда.
Бранител на титулата е Данска. Оваа селекција во последните три изданија го подигна победничкиот пехар, а сега повторно е фаворит за светскиот трон. Данска е рекордер по бројот на освоени титули во низа (има три по ред), додека пак Франција е земјата со најмногу златни медали, има вкупно шест. Токму овие две селекции се сретнаа во финалето на последното СП, а данските ракометари славеа со 34-29.
Данска одбраната на титулата ја почнува против Алжир во Хернинг, дуелот е закажан со почеток во 20:30 часот, во истата група претходно ќе се сретнат Италија и Тунис. Покрај оваа средба на програмата е мечот од групата Ц, Франција против Катар (18 часот), додека во вечерниот термин Австрија игра против Тунис.
КИРИЛ ЛАЗАРОВ РЕКОРДЕР СО 92 ГОЛОВИ
Актуелниот македонски селектор, Кирил Лазаров и натаму е рекордер по бројот на постигнати голови на едно Светско првенство. Нашиот најдобар ракометар на сите времиња на Мундијалот во 2009 година запиша 92 голови. До сега не се најде херој кој може да ја мине оваа бројка.
Лазаров и Кореецот Кјун Шин Јон се единствените ракометари кои повеќе од еднаш биле најдобри стрелци на СП. Лазаров беше најдобар стрелец на мундијалите во 2009 и 2017, а Кјун Шин Јон на Светските првенства во 1997, 1995, и во 1993 кога го делеше првото место со Марк Баумгартнер и Јозеф Елеш.
СИТЕ ГРУПИ НА СВЕТСКОТО ПРВЕНСТВО И ГРАДОВИ ДОМАЌИНИ
ГРУПА „А“: Германија, Чешка, Полска, Швајцарија (Данска, Хернинг) – Главна група 1
ГРУПА „Б“: Данска, Италија, Алжир, Тунис (Данска, Хернинг) – Главна група 1
ГРУПА „Ц“: Франција, Австрија, Катар, Кувајт (Пореч, Хрватска) – Главна група 2
ГРУПА „Д“: Унгарија, Холандија, МАКЕДОНИЈА, Гвинеја (Вараждин, Хрватска) – Главна група 2
ГРУПА „Е“: Норвешка, Португалија, Бразил, САД (Осло, Норвешка) – Главна група 3
ГРУПА „Ф“: Шведска, Шпанија, Јапонија, Чиле (Осло, Норвешка) – Главна група 3
РАСПОРЕД НА НАТПРЕВАРИ
