Менаџерот на Манчестер Јунајтед, Рубен Аморим беше задоволен од победата од 3-1 над Саутемптон во Премиер-лигата. Така неговиот тим неодамна продолжи со позитивните резултати. Вистината е, сепак, дека успехот на „црвените ѓаволи“ не дојде лесно и имаа доза на среќа да направат задоцнет пресврт. Тренерот го призна ова, но рече дека во моментов најважно е неговиот тим да победи, без разлика како.
„Крајот е добар. Беше тежок натпревар кој можеме да го поделиме на два дела. Саутемптон одигра силно прво полувреме и создаде многу простор меѓу редовите. Се браневме кога имаше простор. Кога противникот ја загуби силата, можевме да ја искористиме предноста. Знам дека имаме уште многу работа. Момците беа многу уморни. Но, тоа е добра победа и ајде да гледаме напред“, рече Аморим.
Тој посебно го пофали херојот на натпреварот Амад Диало кој им донесе успех на „црвените ѓаволи“ постигнувајќи хет-трик.
„Дури и во првото полувреме, секогаш кога Амад ја добиваше топката, тој туркаше напред. Тој секогаш бараше начин да ја внесе топката во последната третина од теренот, и тоа е многу важно. Не одигравме добар натпревар , но во моментов најважно беше да победиме. Можеби ви се чини дека ни недостасува ентузијазам, но денеска тоа не беше случај. Играчите се уште не се навикнати да играат во оваа шема, но веќе гледаме некои добри работи во поседот на топката“, додаде Португалецот.
