Нашите момци против Унгарија видоа дека можат да им парираат на фаворитите. Можеби не приредија целосна сензација во првото коло, но сепак добија на самодоверба, која е важна за битките што следуваат на ова Светско првенство. Втор противник на избраниците на Кирил Лазаров е Холандија, селекција која е добро позната и која исто така против Македонија е фаворит. Дуелот се игра денеска со почеток во 18 часот.
Милан Лазаревски потенцира дека добрата игра на отаварањето е важна за продолжение на овој Мундијал.
„Малку сме со измешани чувства по натпреварот со Унгарија, имавме и тоа каква шанса да го добиеме тој натпревар. Но, не обрнуваме многу внимание сега на тој натпревар. Следи дуел што тотално ќе се разликува од претходниот. Тоа се играчи со сосема поинава антропологија од унгарскиот тим. Играта ќе ни биде поставена на поинаков начин, од корен ќе ни биде променета. Откако видовме дека можеме да се носиме со многу поквалитетни репрезентации, амбициите ни се на повисоко ниво. Победа за нас би била идеалната цел, а мислам дека е и тоа како остварлива во актуелнава ситуација.
Не би одвојувал дали повеќе ми одговара Холандија или Унгарија на мојот стил на игра, треба само предностите што би ги имал против нив да ги модификувам. Не би преферирал противник, туку треба да се смени начинот на игра.
Дека квалитет поседува оваа репрезентација за да им парира на репрезентациите во првото и второто коло – апсолутно поседува“, ни изјави вардоровиот пикер.
Лазаревски не заборави да им се заблагодари на македонските фанови кои во голем број дојдоа во Вараждин.
„Ги цениме многу македонските навивачи кои одвоиле средства и време за да го поминат овој пат и да ни бидат ветер во грб и додатен мотив. Навистина, улогата што тие ја играат на овие натпревари е енормна и препознатливи се по нивната жестина, темелност и љубов кон овој спорт и тоа како ни се од големо значење на секој натпревар како дополнителна мотивација и да имаме што подобар резултат со нивното присуство“, додека Лазаревски.
