Со високи 5:0, Аталанта го порази Штурм во првиот од двата воведни меча од 7. коло во Лигата на шампионите вечерва. Во Бергамо, момците на Гасперини дојдоа до лесна победа и три бода со кои за кратко се преселија во ТОП 3 екипите во Лигата на шампионите, со сериозни амбиции да дојдат до место кое води директно во осминафиналето.
Италијанците беа далеку подобар тим од гостите од Австрија и лесно го добија мечот. Ретеги со гол во 12. минута го отвори резултатот, а останатите голови дојдоа во второто полувреме. Пашалиќ, Де Кетеларе, Лукман и Брешанини погодија за конечни 5:0.
Фудбалерите на Монако дојдоа до големи три бода против Астон Вила и на коло пред крајот на лигашкиот дел во ЛШ остануваат во трка за ТОП 8. Моментот на одлука беше 8. минута, кога по една мешаница и одбранет удар од голманот на гостите Мартинез, Синго натрча на топката и со глава ја смести во гостинската мрежа за 1:0, што се покажа и како конечен резултат на мечот.
