Македонската ракометна репрезентација има еден ден да се подготви за дуелот со Катар, но и да се рехабилитира. Добро е познато дека дел од момците вчера имаа висока температура, па лекарскиот тим ќе има полни раце работа, да ги опорави сите оние кои со денови се борат со вирусот.
Во една ваква ситуација, нашите момци одиграа добар меч против Австрија, кој на крајот заврши без победник. Бодот е само доказ дека оваа генерација се бори до самиот крај. Нашите голмани имаа тешка задача, не е лесно да се биде на мрежата против една репрезентација која игра „седум на шест“.
„Уште еден неизвесен натпревар во кој одигравме егал со квалитетна репрезентација. Беше навистина тешко, особено во ситуација кога играа „седум на шест“ на едно исклучително ниво. Таа тактика си носи и свои ризици, но Австријците ја играа квалитетно. Затоа, радува начинот на кој им одговоривме и стигнавме до бод што апсолутно го заслуживме. На ред е Катар, уште една квалитетна репрезентација против која веруваме дека можеме да играме и да се обидеме да се подготвиме. Секогаш одиме чекор по чекор, до вчера се подготвувавме само за Австрија, сепак верувам дека ќе бидеме подготвени и за утрешниот дуел со Катар“, изјави Марко Кизиќ, кој мечот го заврши со шест одбрани.
