Македонија утре од 15.30 часот во вториот меч од групата-2 од главната рунда се среќава со селекцијата на Катар. Јасно е дека и на овој меч нашите ракометари ќе го дадат својот максимум со цел да дојдат до што подобар резултат, а зошто да не и до победа против селекцијата која ја предводи Веселин Вујовиќ.
Милан Лазаревски игра одлично на овој мундијал, а пред утрешниот меч има свој коментар:
“Од она што го видовме со Холандија, Катар не се покажа како наивен противник. Иако бековите во таа селекција се во поодминати години, покажаа дека можат да допринесат и тоа како за нивниот репрезентативен тим. Мислам дека не очекува тотално различен натпревар од претходните, ама ако пристапот ни е ист како и на минатите мечеви, може да дојдеме до позитивен резултат. Според мене наш адут треба да ни биде транзицијата и полуконтрата која ја негуваме, што е евидентно на ова СП“посочи нашиот пикер и продолжи:
“Ако се знае дека нашиот утрешен ривал има постари играчи, можеме да им направиме проблеми. Иако се физички силни, мислам дека се доста троми и таков начин на игра и пристап за нив би било невозможно да ни одговорат. Таму ја гледам нашата шанса за позитивен исход“ заврши Лазаревски.
