Нашите ракометари ја вратија вербата на оние кои пред две години не сакаа да веруваат во системот на Кирил Лазаров. Им беа потребни две големи натпреварувања за да соберат искуство и да одиграат одличен шампионат.
На Светското првенство не само што се пласираа во главната рунда, тука сега веќе имаат четири бода, реми со Австрија и победа над Катар, за продолжување на бајката во Вараждин.
На теренот делуваат како едно, сите играат еден за друг, на никого не му е важно кој е најдобар, најважно е Македонија да победува. Ова го видовме и денеска дури 13 ракометари се запишаа во листата на стрелци. Лазаров уште еднаш ги искористи сите сили и го извади најдоброто од секого.
