Милан Лазаревски и на средбата со Катар, на која победивме со 39:34, покажа зошто е еден од нашите клучни ракометари. Борбен до максимум, знае со своите гестикулации да ја подигне атмосферата кога треба. Од таа минутажа која ја доби од селекторот Лазаров се чини дека максимално ја искористи.
Инаку денеска тој беше стрелец на четири голови.
По натпреварот Лазаревски истакна:
„Многу важно беше за нас да одигравме вака добар натпревар. Гледам да ја искористам секоја шанса која ќе ми ја укаже селекторот. Ги знаевме проблемите кои може да ни ги зададе катарската селекција. Искусни се и многу физички силни, но ја капитализиравме нашата брза игра“ посочи нашиот пикер.
Лазаревски во продолжение истакна и тоа дека оваа Македонија уште не го искажала сиот свој потенцијал.
„Нашиот селектор одлично го подготви натпреварот и ние спроведовме што тој ни претстави пред натпреварот. Овој тим уште не го покажал целиот потенцијал и убеден сум во нашиот квалитет. Се надевам дека уште ќе растеме и ќе играме вака важни натпревари. Сега треба уште повеќе да уживаме и да се надеваме на уште едно добро издание против Франција“.
