Рубен Аморим беше лут по победата на Манчестер Јунајтед над Лестер со 2-1. „Црвените ѓаволи“ дојдоа до триумф со доцниот гол на Хари Мегваер и се пласираа во осминафиналето на ФА Купот, но нивниот настап беше просечен и повторно се слушаа свирежи на „Олд Трафорд“.
„Ова немаше никаква врска со „Ферги Тајм“. Моравме да играме многу подобро и со и без топка. На почетокот ни недостасуваше енергија. По паузата покажавме поголема брзина и почнавме да добиваме повеќе борби. Успеавме да го свртиме резултатот, но сигурно не одигравме добро“, призна Аморим.
Тренерот е првиот кој одговара кога тимот не настапува на потребното ниво.
„Нашата цел е да учиме, да се развиваме и да станеме подобри“, додаде португалскиот специјалист.
Манчестер Јунајтед е актуелен шампион во ФА Купот. „Црвените ѓаволи“ победија на четири од последните пет натпревари во сите натпреварувања, но се на 13. место во Премиер-лигата.
