И на последниот меч од 17-то коло од Супер-лигата немаше изненадување. Екипата на Бутел Скопје ја оправда улогата на фаворит против Прилеп, на гостински терен славеше со 28-33 (16-17). Со овој триумф избраниците на Горан Кузманоски останаа на петтата позиција пред Тиквеш, кој исто има 18 бодови.
Нешто поинтересно беше прво полувреме, во кое домаќинот пружи силен отпор, па дури и водеше, со 7-4 и 12-9. Некаде пред одморот, гостите со кратки серии успеаја да го превземат водството (16-17).
Бутел Скопје во вториот дел влезе посигурен и со шест гола во низа поведе со 17-24 и најави дека овој натпревар ќе се движи во еден правец.
Иако дуелот беше решен, сепак страстите зовреа, во 56-та минута по фаулот на прилепчани над Николов, кој остана да лежи на теренот, настана мала мешаница, која на крајот не прерасна во нешто посериозно. На теренот се сминаа и лицата за обезбедување бидејќи од публиката имаше протести.
Николов имаше девет гола, додека пак Милошески постигна шест. Кај домаќинот Илиески имаше шест погодоци.
