Светското првенство во Хрватска, освоеното 15. место и најважно храбрата игра против многу посилни селекции ја зголеми самодовербата во редовите на македонската ракометна репрезентација. Новата генерација виде дека со максимална битка може да се постигне многу повеќе. Ова денеска на собирот го потенцираше капитенот, Филип Кузмановски.
Тој вели треба да гледаат кон иднината, а таа е светла, треба да се одигра храбро и против Словенија, посакува со помош на домашната публика да дојдат до победа против големиот фаворит.
„Сите знаеме со какви играчи располага Словенија. Играме на домашен терен, дополнителна мотивација ќе биде полната сала. Покажавме дека Македонија и народот верува во оваа млада и борбена екипа. Тоа го покажавме и на СП во Хрватска. Имам чувство дека се уште сме на првенството кое ни донесе голема самодоверба. Очекувам истата борба да ја покажеме и на двомечот со Словенија. Верувам во нас и сакам победа на домашен терен против Словенија. Пораснавме како играчи после СП. Долго време сме заедно и многу добро се познаваме. Хрватска нека биде во минатото, а ние да гледаме во иднината која мислам дека е светла. Имаме три дена добро да ги анализираме. Стручниот штаб ќе ни помогне во тоа да се подготвиме најдобро што можеме“, изјави Кузмановски.
Првиот меч со Словенија се игра на 12. март во салата „Борис Трајковски“, додека реваншот е четири дена подоцна во Копер.
