Македонската ракометна репрезентација вечерва (20 часот) во СЦ „Борис Трајковски“ ја пречекува Словенија во рамките на квалификациите за пласман на Европското првенство 2026 година. Ова е прв меч на домашен терен за избраниците на селекторот, Кирил Лазаров после одличниот настап на Светското првенство, што пак беше повеќе од доволна причина за да билетите се распродадат за два дена.
Бројните повреди во составот на Словенија и полните трибини се повеќе од доволна причина за да Македонија за првпат според обложувалниците да биде фаворит во пресметките со оваа репрезентација, иако во составот има млади играчи.
Но, се оствари она што го најави Лазаров после завршување на Мундијалот, а тоа дека противниците ќе не гледаат со поинакви очи.
Новата генерација во Вараждин покажа дека ракометот има иднина, има момци кои се подготвени да „гинат“ за националниот дрес.
Во нашиот табор добро знаат дека и ослабена Словенија е силна и доволно искусна, но истовремено немаат намера да се предадат, желбата е една – да се одигра храбро и борбено пред домашните навивачи за уште еден неверојатен резултат во низа.
„После Светското првенство ова е прв настап пред домашната публика. Гледате и самите дека владее голем интерес и нацијата е желна за квалитетен ракомет. Играме против квалитетен противник кој играше полуфинале на ЛОИ и заврши на 5. место на последното Евроско првенство. Една многу сериозна селекција која е технички добро поткована и знае што сака од натпреварот.
Ќе пробаме максимално да го искористиме краткиот период што го имаме и да се прикажеме во добро светло. Селекцијата на Словенија е во Топ 8 во светот.
Знаеме што сакаме и се надеваме дека во среда ќе не краси добар ден. Ќе се бориме до последен момент и да веруваме во позитивен резултат. Нема да биде лесно, но се надевам дека со борба достојно ќе им се спротиставиме. Не се оптеретуваме со противникот и ќе гледаме ние да бидеме на посакувано ниво. Треба да го играме нашиот стил кој го игравме и на Светското првенство. Имаме млада и полетна екипа“, изјави Кирил Лазаров за прозивката.
Македонија по првите две кола во квалификациите има победа против Естонија на домашен терен и поразот од Литванија на гости, и го дели второто место токму со Литванците. На другата страна пак Словенија е лидер со две победи во исто толку одиграни мечеви.
Македонија и Словенија за четири дена повторно ќе се сретнат, домаќин на оваа средба е градот Копер.
