Тренерот на Реал Мадрид, Карло Анчелоти беше среќен по драматичното реми 4-4 по продолженијата против Реал Сосиедад во реванш полуфиналниот натпревар од Купот на Кралот. Италијанецот рече дека во ниту еден момент не бил загрижен дека неговиот тим може да биде елиминиран, иако цело време заостанувале во резултатот. Сепак, тој додаде дека не е добро што неговите играчи дозволија четири гола во сопствениот гол.
“Беше многу возбудлив натпревар со многу грешки, но и со добри работи. Беше навистина интересно. Во финалето сме, на крајот ја постигнавме целта. Во ниту еден момент не мислев дека можеме да бидеме елиминирани, бидејќи се може да се случи на Бернабеу. Кога заостануваме во резултатот и треба да се вратиме, никогаш не се откажуваме. Тоа не може да се случи, особено дома пред нашите навивачи”, изјави Анлоти.
Искусниот стратег смета да им недостигало рамнотежна, но е среќен што имаат убиствен напад.
“На моменти немавме среќа. Алаба двапати ја допре топката, но тоа се работи кои се случуваат во фудбалот. Но, да примиме 4 гола не е добро. Доброто е што постигнавме 4, но ни недостигаше рамнотежа во играта. Немаме рамнотежа, но имаме убиствен напад. Не е лесно да се постигнат 4 гола против Реал Сосиедад”, смета Италијанецот.
Тој повторно ја прокоментира арбитражата и особено црвениот картон од Оласагасти поради грубиот фаул над Винисиус.
“За мене тоа беше црвен картон. Немам што да додадам повеќе за оваа работа. Му реков на Висиниус дека ќе го заменам доколку не помогне во одбраната. Од тој момент тој се трансформираше и го покажа најдоброто. Беше многу важен во продолженијата. Даде и две асистенции”, заклучи специјалистот.
