Скопското дерби во првото коло од плеј-офот му припадна на искусниот Вардар 1961, кој на домашен терен славеше против младиот тим на Алкалоид со 34-26 (15-13). Актуелниот освојувач на Купот на Македонија на овој дуел влезе само два дена после мечот против Баја Маре за пласман во полуфиналето на ЕХФ Европскиот Куп. Мечот во СЦ „Јане Сандански“ стартуваше со минута молк за жртвите во Кочани.
Кирил Лазаров на оваа средба не само што не сметаше на Марко Митев, во составот го немаше ниту Никола Костески, а надвор од тимот е младиот Дамјан Митев.
Еден од клучните играчи беше голманот, Фереира со 14 одбрани, Борозан кој запиша 9 голови, додека Хориха имаше 6 погодоци. Серафимов беше стрелец на осум гола, Стојковиќ запиша 5, додека Велковски имаше 4 погодоци.
Вардар 1961 во првите три минути отвори со 3-0. На дргата страна избраниците на Кирил Лазаров брзо се консолидираа, за шест минути направија серија од 2-6 за прво водство на дуелот во 11 минута. Во овој период Галевски успеа да одбрани пенал. По неколку минути игра гол за гол, Вардар на крилата на Борозан (седум гола во првото полувреме) кој беше нереплива енигма повторно успеа да поведе со плус три (13-10 и 15-12). Пред одморот Петковски не успеа да намали на минус еден (15-13).
По две и пол минути игра, Вардар 1961 поведе со 17-13. Првиот гол во овој дел го постигна Ѓоргиев за 17-14, домаќинот водеше и со 21-16. Одбрана на Галевски и реализација на Ивановски беа доволни за да Алкалоид се доближи на три гола негатива (21-18), по што Милано повика тајм-аут.
Со кратка ротација во составот навистина беше тешко за Кирил Лазаров да успее со неговите момци да дојде до ново изедначување. Алкалод со одбрана на Галевски дојде на нови минус три (23-20). На стартот на последните 10 минути Маркоски доби незгоден удар во главата од Борозан, па мораше да го напушти теренот. Сердановиќ од седум метри зголеми на највисоки 27-21. Млади момци на Алкалоид не најде начин да се вратат на оваа средба, беше јасно дека бодовите одат на контото на Вардар 1961.
Во следното коло Алкалоид е домаќин на Тиквеш, додека пак Вардар гостува кај Бутел Скопје.
