Денеска во просториите на Фудбалската федерација на Македонија во 12 часот ќе се одржи ждрепката за полуфиналето во Купот на Македонија. Во шеширот ќе се најдат Вардар, Струга ТЛ, Брера и Шкендија. Ждрепката не е диригирана, за тоа кој има право да игра дома ако се знае дека во оваа фаза се играат по два меча, како што беше и лани.
Инаку првите мечеви се закажани за следната среда (9 април). Со оглед на моменталната форма и квалитет, јасно е дека Брера е аутсајдер, но само да се потсетиме дека лани во финалето играа Тиквеш и Воска и кавадарчани се радуваа, па така и Брера си ја гледа својата шанса.
Колку за потсетување, од сите овие екипи кои се во полуфиналето само Струга ТЛ го нема освоено пехарот, има само едно финале во 2023 кога беше поразена од Македонија ЃП.
Вардар и натаму е рекордер со пет трофеи, ама последниот го освоил во 2007 година.
Шкендија беше победник во два наврати, 2016 и 2018, и Брера како Академија Пандев само еднаш се радувала во 2019.
