Утре во Радовиш стартува тридневната програма во одбојкарскиот Куп на Македонија. Со натпреварите во машките полуфиналиња ќе стартува завршниот турнир, кој и оваа година треба да донесе извонредно возбудливи пресметки уште во полуфиналната разврска.
Во првото полуфинале на машкиот турнир во четврток, бранителот на пехарот Штип УГД ќе се соочи со Работнички 71&22, додека шампионот Струмица 47&72 веднаш потоа ќе игра со велешко ГОК Борец во второто полуфинале.
Струмичани минатата година го загубија Купот во дуелот со Штип УГД, што за актуелниот првак е дополнителен мотив годинава да го вратат пехарот во своите витрини. Капитенот на клубот, Владо Милев, пред почетокот на финалниот куп-турнир вели дека тимот е подготвен за битката за куп-пехарот.
„Очекувам да се пласираме во финалето и сметам дека сме подготвени и да го освоиме купот оваа сезона. Без разлика што загубивме во првенството од Штип, сега започнува најбитниот дел од сезоната, завршница на Купот како и плеј-офот, и сметам дека за крајот го чуваме најдоброто од нас“, вели Милев.
Одбојкарска федерација на Македонија заедно со општина Радовиш како технички организатор од 3 до 5 април во салата „25 Мај“ во Радовиш ќе ги пречека најдобрите четири екипи во Купот во машка и женска конкуренција.
КУП НА ОФМ 2025
ПОЛУФИНАЛЕ МАЖИ, ЧЕТВРТОК (03.04.2025)
ШТИП УГД – РАБОТНИЧКИ 71&22 16:00ч.
СТРУМИЦА 47&72 – БОРЕЦ 19:00ч.
ПОЛУФИНАЛЕ ЖЕНИ, ПЕТОК (04.04.2025)
НАКОВСКИ ВОЛЕЈ – ФИТ ФАН ВОЛЕЈ 16:00ч.
РАБОТНИЧКИ СКОПЈЕ – ЈАНТА ВОЛЕЈ КВ 19:00ч.
ФИНАЛЕН ДЕН, САБОТА (05.04.2025)
ФИНАЛЕ ЖЕНИ 16:00ч.
ФИНАЛЕ МАЖИ 19:00ч.
