Денеска стартува битката за титулата во ракометниот шампионат, на програмата се два натпревари од првото коло во плеј-офот: Бутел Скопје против ГРК Охрид (18 часот) и Вардар 1961 – Алкалоид (19 часот). Во центарот на вниманието е скопското дерби кое ќе се игра во СЦ „Јане Сандански“.
Алкалоид на оваа средба влегува после пласманот во полуфиналето на ЕХФ Европскиот Куп. Иако избраниците на Кирил Лазаров имаа кратко време за подготовка и одмор, а „црвено-црните“ се фаворити, од клубот порачаа дека одат на победа како и секогаш. Ракометарите се подготвени за борба во која се надеваат дека судиите нема да го имаат главниот збор. Алкалоид очекува праведна и непристрасна арбитража, без толерирање на набиени ребра и крвави носови, случај што беше на претходното дерби во Битола.
„После пласманот во полу-финалето на ЕХФ Европскиот куп, екипата на РК „Алкалоид“ е спремна да го даде својот максимум вечерва. Одиме на победа, како и секогаш!
Очекуваме голема борба, а арбитражата ќе биде повторно во рацете на парот Начевски-Николов, како и на претходното дерби во Битола. Се надеваме дека овој пат, ќе гледаме натпревар со праведно, непристрасно и објективно судење, без толерирање на набиени ребра и крвави носови.
Разбираме дека секој може да има лош ден, дури и еден од најдобрите судиски парови, но најважно е фер-плејот да биде ставен на прво место – и на теренот и во одлуките. Нашиот императив, како во бизнисот така и во спортот, е взаемното почитување, спортското витештво и интегритетот. Истото го очекуваме и од сите учесници на теренот“, ни изјави претседателот на клубот Горан Минов.
Алкалоид во плеј-офот пренесе два бода, и оваа сезона на крилата на младите играчи остана страв и трепет за фавортите за титулата, кои пак во ростерот имаат странски репрезентативни имиња.
