Со убедлива победа во три сета над екипата на ГОК Борец, одбојкарите на шампионот Струмица обезбедија место во големото финале на Купот на ОФМ. Во вториот полуфинален меч на Ф4 турнирот во Радовиш, Струмица покажа дека полека влегува во врвна одбојкарска форма и не им дозволи на противниците да се доближат до изненадување во ниту еден од трите сета.
СТРУМИЦА – ГОК БОРЕЦ 3:0 (25:13, 25:18, 25:18)
Особено доминантен беше првиот сет во кој струмица им препушти само 13 поени на велешани. Во вториот сет разликата можеше да биде и поубедлива, но во завршните неколку поени Борец успеа да направи серија од три поени и да го заврши сетот со прифатлива негатива.
Третиот сет беше копија на вториот. Борец успеа да дојде до нови 18 поени, но не и да се приближи кон евентуално освојување на еден сет. Струмица во саботното финале ќе се сретне со Штип УГД и ќе се обиде да му се реваншира за минатогодишниот пораз.
